GIKUYU 64 - 40

1. Paulo oimiriirwo ni Mwathani Na utheri munene na mugambo Na agituo githima githeru Gia gwithambwo ni nduriri ciothe   2. Akinya ituura ria Akorinitho Amerire matuike ngoro imwe Matige kugayania Mwathani Jesu ti aingi ni gitina kimwe   3. Amatarire akimathaithaga Akimera andu aria maari na Musa Mabatithiirio itu-ini ni Ngai Niguo marumagirire Musa   4. Ngai amaheire ruiga rwa maana Na akimahe githima kia Roho Matuike njamba na momiririe Mahure nduriri macinine   5. Mombire ngai ya muhianano Makiruga iruga maugoce Magiikara thi kuria na kunyua Magicoka magiukira kuina   6. Acio matiakenirie Jehova Matetire macokio Misiri Na magitharania makiuragwo Ngiri mirongo iri na ithatu   7. Ithui turi atuire kumakira Nituhetwo Roho wa mwihitwa Na aria magatuma acambio ni andu Matikoherwo o ri kana ri.

1. Roho nietereirwo iguru Ni anabii na Araika na Atumwo othe Na Ithe wao Iburahimu   Tugakena muno muno Twaringa rui rwa gikuu Tuthii iguru bururi wa Andu aria atheru   2. Nimoririe Gaturume ‘‘Ninginya ri tugutura na maithori Nakuo thi no uhoreri?”   3. Ni merirwo meterere Aria makanyaririka me na mwiri Ta uria o manyariragwo.   4. Nake Mwathani munene Tondu wa wendani wake na tha nyingi Akimahe nguo njeru.

1. Ni gikeno kinene gia kuonana na inyui, Tutumitwo ni Ngai tuke tuhunjirie. Kirindi gia guku thi niakiendete muno, Ni endaga kihonoke gituike kia ruru ruake.   2. Thikiririai inyuothe muigue uhoro mwega, Nani wakumukenia muikare na thayu. Jesu kristo niokire kuhonokia ehia, Onawe uri umwe wao itikia umuthi.   3. Muthenya wa ithiriro tungikorwo ithuothe, Turi a Mwathani umwe Mwathani witu Ngai. Nigukagia gikeno gikeno kinene, Ithe nyina na ciana makiinuka mucii umwe.

1. Muru wa Ngai oigire andu aria A muhiriga wake Ni aria maiguite watho wa Ithe Makaurumirira Ndamuthaitha mukiriririe Andu a Ngai mwendane Muiyuritwo ni uiguano Wa Roho Mutheru   2. Roho Mutheru amuciarire Mutuike a Ithe umwe Na mutuike a nyina umwe Na a muhiriga umwe   3. Thiagai muiyuirwo ni tha Mukimenyagirira Maathani ma Jehova Ngai Nimo muoyo wanyu   4. Giai thayu mwirigiriire Muoyo uria utagathira Na gikeno kiria muigiirwo Mucii wa matu-ini   5. Ngai eraniire muoyo wa ma Niguo kiheo giake Kiria gikaheo aria atheru Mucii matu-ini.   6. Roho mutheru atonya ngoro  Ahehenjaga ciiga  Agatharia nyumba ya tene  Agaka ingi njeru.

1. Ngumwira nama itari na nganja, Mundu uria mugi niethagathage. Tutiri na kindu twetereire, Wira wa Robo ukirie guthira.   Ndugatindirire waigua ukiurio Rugendo ruru rugathira ri? Mwathani oigire agoka ta muici, Matawa manyu mutikahorie.   2. Mwithukia ethukie ngumwira niguo, Hindi ya igai akagaya ruo. Aria atheru tukigaya muoyo, Na thumbi ya muoyo itabuthaga.   3. Rugendo ruru nguigua ngimenya, Ndiri na nganja no ngahotana. Rui rwa gikuu ngaringa nginye, Mucii wa iguru ndina gikeno.   4. Kuu kwa baba matu-ini iguru, Gutiri kieha kana maithori. Jerusalem mucii muthaka, Nikuo ngatura na ndimuonage.   5. Mwathani ni oigire ndagatiga, Wake mwihokeku mathina-ini Nawe turaga wi mwihokeku, Naniukaheo tanji ya muoyo.   6. Nii ningwiyuria ni ngakinya, Bururi uria njirigagirira. Nyume bururi uyu wa maithori, Thii kuria gutari na maithori.   7. Kirigiriro giakwa kinene, Kiria nduraga njirigiriire Ni muoyo uria wa tene na tene, Na ni ngaheo ndakinya iguru. ...

1. Mutikahumbwo kanua na ihaki Irai andu othe Jehova ni mwaki   Ngai uri njamba, Jesu murango Utakahota kuhingurwo ni thu   2. Ngai aka nyumba yothe akirikia Ni amikirire murango uri hinya   3. Jehova niagatahika riko Andu aria aganu na aria imaramari   4. Hinguro cia thi ciitagwo ihaki Na Muthamaki Jesu ndagacioya   5. Niwe kihingo gia thi na iguru Gia gutonyerwo ni atheru na araika   6. Waigua witikie na ngoro yaku, Na ciiga ihingie wina mahinguro   7. Buku ya watho na ya maritwa Niyandikitwo muthenya wa ituiro   8. Wendani na tha na uhoreri Ciarathimiirwo Jesu ni Ithe witu   9. Kwinyihia na gutungatira andu Na ngoro theru ni ikahingurirwo.

1. Riitwa ria Jehova wa Iburahimu Ni ritheru nama na ni riamure Ni erire Musa oige, ritikanagwetwo Ni mundu uri na itheru, tondu ri hinya.   horo uria maiguire na matu Na makiona uhoti wa Jehova Matiagunikire mekire Ou uria mundu eririirie.   2. Ciana cia Jakubu nicieyoneire Uhoti wa Ngai uhumbitwo Musa Haroni ari muira, Misiri gukiunuhwo Mithithu na miihoko ya bururi ucio.   3. Marutwo Misiri ningi makiona Iria ritune rikieherera Maguta ma Jehova mari ngoro ya Musa Mutheru wa Jehova, mutumwo wa ma.   4. Ningi mahutire Jehova akira Musa niare metha weru-ini marie Migate ya iguru na ndutura cia weru Ngai agicirathima, makirwo marie.   5. Jehova nimwega tondu manyota Niamaheire mai matigathire Ugituika uira wakuonia nduriri Ati ni Jehova, wi mbere yao.   6. Mutikananyue maria njira-ini Kana munyue mai ma kwaraha Githima kia muhiriga uria wa Juda Murita wa Daudi ni githerukaga Mai me muoyo.

1.  Ithui twi ciana cia Ngai, Munene wa iguru Na guku thi guothe na rungu rwa mai, Roho niwe mutogoria twambate matu-ini.   2. Riathani rieru ni hetwo ngerwo ni wendani Na kwinyihia na gwathika, Rugendo-ini rwakwa Na witikio ni ngo yakwa, Ngiambata matu-ini.   3. Roho ekuga atindagio Hingo ciothe miigua-ini Akihitana na andu aingi Ndeto-ini cia tuhu, Na maagite gukindiria Njira ya matu-ini.   4. Ngai ndendaga mundu ore niwe witeaga, Niundu wakwirorera miago ya thi-ino, Wihoke Roho Mutheru akwambatie Matu-ini.   5. Andu othe a guku thi mari rugendo-ini Amwe meguthii mwaki-ini Na aria angi muoyo-ini Thomai mandiko wega twambate matu-ini   6. Murata ni wetereiruo mucii wa gikeno, Na tanji yaku inyititwo ni Mwathani waku Na nguo ya gutorania mucii wa matu-ini.

1. Uria utari na ugi niagie na ugi, Matuku maya nimo ma ithiriro. Roho arikie wira twambate, Mucii wa matu-ini tukahuruke.   2. Tukainukia utonga wa mithiire, Miega ya uthingu mucii wa iguru. Na inyui aria a guku thi mukainukia ki? Waganu na miago itikona uikaro.   3. Ndiraigua migambo ya Araika, Makiinira ngiri cia uhonokio. Cia aria mahotete ita cia thi-ino, Hingura Mwathani atheru matonye.   4. Acio ni aria atheru marigiciirie, Iti cia uthamaki na nguo njeru: Manyitite inanda cia kinubi, Tugakenaga atia twakinya iguru.   5. Tugetwo njamba iria ihotanite,  Ciumite ituri inya ciothe cia thi-ini  Ciihumbite uria wa Gaturume  Hingura Mwathani atheru matonye.

1. Aria mehokete ritwa ria Jesu, Ni mehereirio kirumi kia Ngai. Tondu nio ciana cia uhonokio, Wa thakame theru ya Gaturume.   2. Acio niarua mehokete Mwathani, Hindi iria mekwirwo mehoke Jesu, Magiaga wendo wa kumumenya, Umaga guoko-ini gwa Gaturume.   3. Muhonokia wao ni akamera, Moke hari we amagirie maithori Maria mariragira rugendo-ini, Rwa guthii muoyo-ini makahuruke.   4. Makagathiririo mbere ya Araika, Na mbere ya irindi ciothe cia thi-ino Tondu nio ciana cia uhonokio, Wa thakame theru ya Gaturume.   5. Nimagakenaga makirorera, Mwago wa matu-ini meriragiria. Mahumbitwo riri na nguo njeru, Na kugoca Jesu mena gikeno.

1. Kau ni kayu nguigua kanene, Roho akiariria ngoro cia atheru. Aria methurire ngoro na miiri, Na indo cia thi-ino itamenyagirwo.   2. Kuri thi njeru na iguru rieru, Iria iri riu ni igathira biu Nao andu aria othe maciihokaga, Mahubwo njonoko tene na tene.   3. Ciiko cia uthingu na cia waganu, Buku ya ituiro ni ciandikitwo Hingo ya igai nicio ikonanio, Wira wa mundu na igai riake.   4. Atheru mahota mbara ya thi, Rugendo ruru kuma mwiri-ini Hingo ya igai nimugakena, Mucii wa iguru hamwe na Jesu.

1. Kuma okiambiriria gia kumba thi na iguru, Ndiri ndahitha mundu wakwa ndundu. Tondu ni ndimwiraga o undu wothe ngwenda, Ni ndikaga anjira atari nganja.   Tonyai thabina-ini muhonokio, Thakame-ini ya Jesu ni thabina ya muico. Nuhu aka thabina yarika magitonya Mbura yoira aregi ni maninirwo   2. Ni ndehirie rimwe ndamuthura Saul, Riria ndamuhurithirie Samweli Ni ndathire Saul akanine indo ciothe, Na ndagatigie Kindu kiri thahu.   3. Saul niaregire agitigia Agagi, Ona ndurume imwe iria ciari noru. undu uyu ndwangenirie wa uremi wa Saul, Ni ndathanire aninwo hamwe nacio.   4. Ngwenda muririkane uria ndathire Loti Aikarite itura-ini ria Sodomu Ni ndamwathire Loti ni nguthukia Sodomu, Oime kuo o na ndakanehugure.   5. Undu uyu ndawikire niguo nunge mahitia, Maria mekirwo ni muka wa Loti. Tondu wa kwihugura na uguo ni ndaregete, Hinya wakwa wamutuire o gicumbi   6. Ngwenda muririkane ndungata ya Elisha, Ni mumiui mumitaga Gehazi, Yeririirie gutonga ona inine nja...

1. Jehova Ngai etire Musa, Na mugambo wa Muraika,  Ninii Ngai wa aria me muoyo, Ndiri wa aria akuu.   2. Ndagwita ngutume Misiri, Ninjiguite kunyaririka Kwa ruciaro rwa Iburahimu, Ona ruo rwao.   3. Marigithathi ma Misiri, Moragirwo ni muraika,  Tondu itugi cia micii yao, Itiari thakame.   4. Nindiraga aria angi me muoyo, Wee wonanirie uhoti waku, Na uthamaki wa Firauni, Na guoko kwa Musa.   5. Maherewo mai weru-ini, Moimite thiini wa ihiga, Nario ihiga riu ni Mwathani Na mai ni Roho.   6. Jehova Ngai etire Musa, Akimwira iyira mathani Magutongoria Israeli matuike tawa.

1. Mamuthurire tuhu Mwathani Jesu, Namakimwendia mbia Mwathani Jesu, Na makianirira na mugambo munene, Makiuga niakambwo muti iguru.   2. Mokire mena hiu na ndotono, Judasi ari mbere amatongoirie, Judasi akimuria Rabii uri muhoro, Akimuhimbiria amumumunye.   3. Niambirwo muti-ini Mwathani Jesu, Nioirire thakame ta githima, Jesu akiguthuka na mugambo munene, Akiuga moherwo mehia mao.   4. Muraika wa Ngai agiikuruka. Akieheria ihiga ria mbirira, Gukigia githingithia kinene muno gia thi Thigari ciari ho ikimaka ma.   5. Mugathurwo tuhu na muragwo, Na muikio korokoro ni athani athi, Na muhurwo muno na mugicirithagio, Na mutuirwo mata niundu wakwa.

1. Mucemanio munene wa muoyo niugacemanio iguru. Maitho makwa nimakerorera mucemanio wa muoyo, Rui rwa gikuu narua tugakena twakinya iguru Twamenya riu twi muoyo.   2. Gikeno kinene twihariirie tugakena muoyo-ini, Thina na maithori ni igathira twakinya gwake iguru, Tugaikara twendanite muno twamenya tutigakua onari, Tugaikara na gikeno muno tugaturania nake   3. Muthenya wa muoyo tugakena twatiga miiri itu, Hinya wa mwiri na kwenda kwaguo niigatigwo guku thi, Muoyo wakwa wega-ini kundu gutari thina wa gikuu, Ngaturaga na gikeno muno ndamenya riu ndi muoyo.

1. Ni gikeno ngoro-ini yakwa Kia Mwathani, kia mawega, Maria ndiyoneire he Mwathani,   Mwathani wakwa unjoe Na Roho Mutheru anjoe, Nianjariirie.   2. Ndahiikite gwa caitani mucii, Na ngakirwo kwari miago, Na moriru maingi na mogwati.   3. Ndeterera ahunjia mahunjirie ndingimaigua Ndeterera arata mahunjirie Ndingimona.   4. Ni mugambo wa Roho Mutheru wanjarariirie Ndari njaga na ndaconokire Nianjariirie.   5. Kiungano-ini gwa caitani mucii nianjariire, Ndari muriu wa njohi utuku ni anjariire   6. Riu Mwathani wakwa njohera macio mothe Ni nderira riu ni ndetikira Nyamukira.

1. Isaia ndungata ya Jehova Nῖerire hinga-ici na Roho Munenehagia Ngai na tunua Na ngoro cikaire kuraya.   Menyai Ngai ndahenekaga Tondu ti muru wa Adamu Nioi mithiire yanyu inyuothe Nakamenya meciria manyu.   2. Ngai ena marakara manene Niundu wa andu aria amure Magarurukiire muhianano Makaruma Roho Mutheru.   3. Roho eguthaitha andu othe akamera Tiganai na mihianano Muhoe Ngai uria wamumbire Na niarimuheaga mbura.   4. Ta uria mbura yonanagia mbeu Iria hithe tiri-ini ni andu Noguo Roho akonania meciria Maria mahithe ngoro cia andu.

1.  Ningenaga muno ndamenya ndigetigira thi Ona ingiinaina hinya wa Mwathani ni ngo yakwa   2. Ninjiritwo wega ndikanetigire imakania Ciothe cia thi-ino tondu ndina Jesu rugendo-ini   3. Ona ndona thina utonga wakwa uri matu-ini Ningawonaga nauria ndinaguo thi ndikawona   4. Ngwirorera ngona thi ino yothe gutiri thayu Aria mari kuo no mihang’o miingi itari kiene   5. Na gutiri ungiigua mugambo wa Jesu murithi Agitana iguru akiuria ngirie guka muikaire-atia   6. Mwetereire kuona mwago wa uthamaki wa thi-ino Ukirie guthira muthenya wa ituiro mugeka atia   7. Mihango na miago mugatwarwo nayo mwaki-ini Mwaga kwirira mutikona thayu ona mweka atia

1. Ngoro yakwa uka na tawa waku, Uke wakie guku guku ti kwanyu. Naguo hinya wothe wa guku thi-ino Nduri undu ugagwika wehoka Jesu.   Jesu ari mbere, Jesu ari thutha, Jesu ari mwena-ini, muriithi mwega.   2. Thu itu caitani ona hinya wake, Jesu niahotete na gikuu giake. Nduri ona hinya ona hanini, Niwe muhoteku na muhuthu biu.   3. Ukiraga tene mbere ya andu othe, Uhoe witie hinya mahinda mothe. Tondu wi mbara-ini ndukanerigwo. Oya indo cia mbara na ndukahotwo.   4. Mutongoria waku ni Jesu Kristo, Nacio indo cia mbara ni kiugo giake. Thi-ino niigathira ona matu-ini, No kiugo kia Ngai gitigathira.   5. Wona wahotana mbara cia thi ino, Jesu niagakuhee thumbi ya unene. Ugatura matu-ini hamwe na Araika, Na aria manahotana mbara cia thi-ino.

1. Hindi iria twaturaga thi tutiari matu Agituhingura maitho agituonia mbere Angitumenyithia mbere kwi muoyo Na mutoria niwe ukawona.   2. Githikiririei muigue kiugo kinene Gutiri weyui riria twaturaga thi Agicuthiriria akiona ni twagiriirwo Ni kumuhoya twi guku thi.   3. Thiritu ya Athuri murehage utoria Mwamenya o wega nimwathurirwo Mugituwo muturia wa indo cia iguru Mukiuge Haleluya kenai muno.   4. Thiritu ya Anake murehage utoria Mwamenya o wega ati ni mwathurirwo Muruirire Ngai muhuro wa riua Mukiuge Haleluya kenai muno.   5. Thiritu ya Atumia murehage utoria Mwamenya o wega ati mwathurirwo Mwinyihagirie Ngai nake amutarage Mukiuge Haleluya kenai muno.   6. Thiritu ya Airitu murehage utoria  Mwamenya o wega ati ni mwathurirwo  Mukirutwo kuri thi ino itakindagiria  Mukiuge Haleluya kenai muno    7.  Twamwihoka mutwathi tutikaga kindu  Niwe watuthurire tutari undu tuui  Naniatui muno kuri uria twiyui  Tumwirekerer...

1. Kirima-ini gia Sinai Ngai ni aririe na Musa Akimunengera kibau kia mathani ikumi make Twariganiirwo ni Ngai na Mathani ikumi make Muhonokia agicoka mugatigwo mukirira Ui Ngai ni twatigwo.   2. Mwathani witu agiciarwo, aciarirwo ehokete Ithe, Onake ithe akamwihoka, ona riu no mendaine Andu a guku thi mwendaga atia.   3. Athamaki a guku thi thamakai na kihoto Niguo Jesu agicoka, agakenio ni uthamaki Uria muthamakiire andu ake.   4. Jesu agiuka ukamuhe ki? Na ti mburi na ti ng’ombe Kana ihaki ria guku thi. Wicuranie ngoro yaku kiria ukamutunga na kio   5. Makariraga ui iya Mwathani witu tuiguire tha Twaiguaga wi tha nyingi twaguthaitha tuiguire tha.   6. Nake Jesu ni akamera kahinda ni kahituku Thiii mbere gwa caitani niwe mutongoria wanyu Na nowe ungimuiguira tha.

1. Mwathani Jesu oragithirio, Ni endi mbia Itonga na aremi, Niguo watho ndukagarurwo. Ngai muigua tha na Mutugi,   Igua gukaya na kurira Thi-ino no ta Misiri.   2. Isaia hinga ici ni oigire Ati munyendaga na miromo, Na ngoro iri kuraya na nii   3. Aria othe twagocaga nao, Megarurire ta Judasi, Matuike thu na ahitithania   4. Murata wakwa ndukamake, Andu a caitani makarira. Bendera irorete mwaki-ini   5. Aria mehuraga githuri Mena indo ciao cia waganu Mahitithagie andu a Mwathani.   6. Thiomi cia thi-ino ni igathira, Tukaheo thiomi ingi iguru, Mundu onanagie wira wake   7. Petero ni erire thigari, Mutikanyambe ta Mwathani, Munyambe nyinamite mutwe.

1. Mbara ni nene ndi rugendo-ini Ni ngwihokete Ngai wakwa. Njirigiriire Muthenya mweru Wa kuhurukio kwa aria atheru. Ngakena muno gikeno kiingi Ndoima mwiri-ini hotanite Ndamenya wega mbaara cia mwiri Na ndeto cia andu ni ciathira   2. Rugendo ruru ndiri na mwago Kana gikeno ndi mbara-ini Nanii ninjui mwihoko wakwa Gikeno giakwa ni Mwathani Mathina mothe na mbara ciothe Ni njui wega ndahotana. Muthenya wakwa wa kuhuruka Ndigacoka kuririkana   3. Caitani nioi kiria winakio, Ngoro-ini yaku ni uhonokio, Ndukanerigwo, wona werigwo Hingo ya igai ni ukarira. Muthenya mweru ucio twetereire, Jesu agicoka na uthamaki, Agwete Kihoto na unene wa ithe, Nduriri ciothe niikarira.   4. Nitukinyite haria hatheru, Gacumbiri-ini ga kirima, Mwirorerei maugi ma andu, Ni merekeire gucirithio. Rugama wega Ngwataniro-ini Ni ukahotana he Mwathani Mucii Mutheru no Ngwataniro, Na wendo muingi kuu iguru.   5. Nduriri ikona utheru wa andu aria Mahotanite rugendo-ini, Marugamite na nguo njeru, N...

1. Jesu niwe muriithi wakwa, Riria nguthii rugendo, Ndirikanaga mathina make, Ngegwatania na Roho.   2. Ngoragwo ni mathina ma thi-ino, Ngiumbura uira waku Ngarira na kieha ndi thi-ino Ngeruta na hinya.   3. Ingiunganirwo ni mbara cia thi-ino, Roho niwe muteithia Wakwa rugendo ruru ruthire Nyinuke ngahuruke.   4. Arata akwa aria mari thi-ino, Ndegwatania na Jesu, Mandigire magithii icera riao Ngiikarania na Roho.   5. Ndaguthaitha Ngai wa iguru, Nindiganiirwo ni thi Na ikeno ciothe iria iri thi-ino Ndiririirie kuinuka.   6. Minyamaro ya thi yathira Ngatura na gikeno Ngamenyaga gikuu nduri hinya. Ngagathiriria Roho.   7. Niundu anjiraga ndi guku thi Nyite rugendo wega. Ndi hakuhi kurikia wira Nyinuke ngahuruke.

1. Gia na ngoro njega ngoro yendete Ngai Ngoro yendete andu othe kiheo ni muoyo Iyuruo ni gikeno kiririria muno Jehova Ngai erire Adamu irio ciake Ni arionaga na minoga ciothe na thithino   2. Johana ahunjirie ena mukwa njohero Irio ciake no ngigi kiheo ni muoyo   3. Jesu athaithire Ngai thithino igiitika Matata ma thakame kiheo ni muoyo   4. Atumwo moranirie munene ni uriku? Jesu akimonereria kiheo ni muoyo   5. Wenda utuike munene winyihie wathike Utungatire andu othe kiheo ni muoyo   6. Wamenwo na warumwo na waigirirwo igenyo Ririkana wega kiheo ni muoyo   7. Rugendo rwaneneha na thina waingiha Ririkanaga wega kiheo ni muoyo.